2017年10月10日 星期二

【直話直樹】去新西蘭坐監仲好過做客戶經理



上個星期提到去新西蘭坐監仲好過做客戶經理,聽落去好似好荒謬咁,今次就同大家分享下有幾荒謬。

新西蘭係一個非常重視人權嘅國家,就連監獄亦都唔例外,首先新西蘭嘅教育係十分之乾淨嘅,基本上每日都會有專人進行打掃,因為本身新西蘭就一個乾淨嘅國家,所以監獄亦都係永遠乾乾淨淨嘅。反觀客戶經理個位,雖然一樣有專人打掃,但係其實佢都係求其抹兩下,有時候個垃圾桶滿晒都無人清理,當然明白呢啲都係小事情啦。

喺電視入面,你可能見到監獄入面通常都會有籃球場,新西蘭監獄除此之外佢仲有桌球枱同乒乓球枱,你一系列嘅設施其實都係激勵犯人嘅其中一種方法。而係銀行入面呢,激勵你嘅方法就係用盡辦法去侮辱你,大庭廣眾同你玩role play無錯,銀行入面都有休息嘅空間,但係嗰個空間你上司係會隨時衝入來然後捉你去見客,莫講話做下運動,合埋對眼都未必得。

監獄裏面嘅房間基本上都係單人間,因為佢哋認為罪犯都一樣有私隱,房間嘅設計同大學宿舍係好相似,書枱同床合一。客戶經理呢?唔係間間銀行嘅客戶經理都有自己嘅位置,有一啲就係樓上係電話中心咁,約到客咪落樓下見囉,有一啲就係固定左位置兩到三個人輪着share,冇你嘅私人空間嫁。

為咗幫助罪犯了解世界,大部份房間裏面都安裝左電腦可以上網,等佢哋可以多睇書多學習,以免同社會脫節。銀行部電腦呢?為左保障客戶嘅私隱同資料,好多都唔可以上網啊,呢點筆者係讚成既。不過講到同社會脫節,你要學習嘅就係銀行俾你嘅方向,佢話睇好邊個市場就係睇好邊個市場,你唔需要有自己嘅思想。

新西蘭呢個國家人與人之間嘅關係都非常好,獄警經常都會同返人一齊跳佢的當地嘅傳統舞蹈,平日犯人都冇統一嘅制服,大家鍾意點着就可以點着。嘩!你試吓同你個分行經理話你想同佢一齊跳舞丫拿,你估佢會用一個點樣嘅眼神同語氣去回應你?

曾經有視察監獄嘅人,認為犯人食嘅下午茶只係一份三文治,覺得營養不良,對犯人待遇太差,搞到新西蘭監獄被大眾炮轟。你想像下試吓投訴你上司對你待遇太差,睇下你會有咩後果。


明白讀者可能會話你返份工有人工收,坐監冇。但如果你係香港地努力工作,目標只係換取一個好細好細嘅私人空間,你不妨可以考慮下新西蘭監獄。

爬文勿認真,輕鬆下啦香港人。

2017年10月4日 星期三

【直話直樹】竊聽風雲

老細最怕下屬做啲乜嘢?當然就係蛇王、唔跟住指令去辦事。全部呢一類型嘅同事都會好似恐怖分子咁,全力監察,日常就會係你位置嘅附近無聲無息地出現,睇下你係唔係真係打緊電話俾客或者見緊客。

當然你可能會覺得呢件事好正常,因為所有老闆嘅職責就係監察員工,不過講到指令呢一樣野,你就真係估佢唔到,因為佢唔單止想限制住你推銷乜嘢產品,連你嘅推銷手法都想控制埋,一旦佢發現你講緊嘅唔係佢教你個套手法,佢就覺得你偏離左軌道,然後覺得你唔掂,不停用佢凌厲嘅雙眼向你施壓,話俾你聽你唔跟返佢嗰套你就仆街啦。

唔成功唔使諗一定俾佢訓足成粒鐘話,話你浪費晒啲機會,比客你見你都唔識珍惜,唔好以為你成功就冇事,佢一定會話你如果跟佢個套唔止做咁小野啦,ok fine,你係老細你話咩就咩啦。

最癲嘅老細就係佢有一股離晒大譜嘅控制慾,冇嘢做就會係間房睇實閉路電視,監察職員嘅一舉一動,以防你偷懶,有時候仲會特登打你內線測試你會唔會特登唔聽佢電話。最犀利嘅就係佢無聊嘅時候仲會開埋你嘅電話記錄聽返你嘅對話,睇吓你打嘅每一個電話係唔係一個正經嘅電話,時間太長又話你講太多廢話,太短又話你同個客傾唔到啲乜嘢。

有時候開會嘅時候佢仲會大條道理聲稱係為咗檢查同事有冇違規銷售同服務態度係點,開下業績最差嘅同事出嚟聽吓,實情係想落你面,大庭廣眾俾大家聽下你平時同客係點樣傾計,等你覺得有一種羞恥嘅感覺,然後你就會乖乖地努力跑數。

我有時係度諗,其實你有啲乜想同老細講你係部錄音電話度講咪得囉,你可以試吓同個客話:「陳生,求下你唔好收線啊,如果我哋咁快收線,我老細會覺得我冇做嘢架,麻煩同我傾多幾句計啦,可能我會有人工加架!」係囉,如果你聽落去覺得好無聊嘅話,唔知點解啲老細又會因為個通話紀錄長短而去判斷職員有冇做到野呢?Anyway大家有乜好既留言俾老細記得分享下,反正佢分分鐘聽你嘅錄音仲認真過聽你個人講嘢,其實唔知係咪每一個人心裏面都會有一種想「偷」嘅感覺呢?


真係唔好以為做客戶經理一個自己嘅位,好自由。其實真係去新西蘭坐監仲好過做客戶經理,點解係新西蘭?你Google下就知道。

2017年9月27日 星期三

【直話直樹】成敗不足以論英雄

有知道直樹真身嘅朋友問過我,究竟銀行係唔係真係咁多野寫,我都想冇,但係偏偏可惜嘅係仲有好多。

直樹一直都認為好多時候錯不在人,錯在制度、文化、價值觀等,今次就想同大家討論一下銀行裏面嘅究竟係點去評定一個人?一般人可能第一個諗到嘅就係錢,人工越高、地位越高、尊敬你嘅人就越多。我絕對同意,不過我諗呢一樣野唔單止淨係喺銀行業裏面發生,係一個社會嘅問題,所以我亦唔多去討論。

如果正正讀緊呢篇文章嘅你,你會覺得係銀行裏面衡量一個同事有冇能力一般嘅標準係啲咩呢?係佢有冇數。

係銀行裏面同你泛泛之交嘅同事,開口埋口嘅話題就係話自己今日有數定冇數,我開頭覺得呢一件事好奇怪。我明白可能係冇話題講,但係有數又點呢、無數又點呢?又咪係一樣返工畀人鬧,放工俾人鬧。搵得多真係等於開心咩?

慢慢經過多年嘅觀察就會發現喺客戶經理們心入面,一個同事有數就係代表佢好叻,係大家嘅學習對象,要以佢為榜樣工作;冇數就係垃圾,直頭野都唔想同你講,覺得你係負累。有數嘅人慢慢係公司嘅地位都會越嚟越受到尊重,其他同事有客一定會俾你,講句嘢都可以大聲過人。

冇數嘅垃圾永遠只會係垃圾,無論你識幾多野都一樣係垃圾,唔好諗住自己懷才不遇,因為係佢哋眼中嘅「才」就係你條數,唔係知識或者能耐,所以就算你另就高明,一樣唔會發掘你認為你有嘅才能,呢一行就係咁。

如果呢刻有數嘅你,突然間冇數會點?你所有擁有嘅一切權力、地位、身份都會一齊消失,因為呢個地方衡量一個人嘅價值就係你有數定係數。

要知道一個人要放棄名利並唔容易,要維持自己工作環境嘅地位係一件好辛苦嘅事,相信大家都睇過唔少電視劇,有多少個角色就係因為放唔低自己所擁有嘅一切而走上一條不歸路。

古謂:成敗不足以論英雄。英雄係一種可以喺佢身上尋找到激勵你奮鬥、積極向上或者讓你為之情動嘅人。所以我哋應該先係認定佢係英雄,其次先會去睇佢係咪成功,有幾成功,並唔係佢有數就係英雄。你的英雄又是誰呢?

2017年9月20日 星期三

【卡爾手記】卡爾的投資歷程


由於過去一段時間一直埋首於處理投資月刊以及平日的工作事情,一直未能可以執筆重寫文章,但隨著近日手頭上工作放鬆了,都希望可以在往後繼續和大家分享一下投資的小事。今次亦想漫談一下卡爾過去的投資經歷,特別是當中有血有淚的損失經驗。
卡爾屬於典型的金融人士,由讀書讀金融再到畢業走入金融界,完全係一個注定的金融人,但同樣地,即使作為一開始就走進投行的金融人士,卡爾亦不見得對投資有十分深入的了解,都曾經單純地以為投資都只是簡單聽聽電台上的號碼,甚或看看電視上的財演,便等於學會了投資的真理,現在回想起來亦不禁要說「少年你太年輕了」。

當然,在風平浪靜人人都賺錢的年代自然無人會察覺自己有問題,卡爾亦真的以為投資很簡單。所以就曾經試過聽從一位親友推介過的一隻科網股,講解這隻股票當中的無限幻想,甚至指他的分析師同事都力推這隻股票的潛在增長動作,而且當時眼見股票不斷上升,卡爾立刻重注押入這隻股票,以為可以嬴個首期,點知最後輸到貼地。該科網股在買入後就不斷下跌,卡爾以為係技術性調整,不用擔心,可惜這一調就慢慢調到買入價六至七成以下,眼見每日慳飲慳食而留下來投資的錢,竟然因為一個決定就輸到乜都冇,真是一子錯,滿盤皆落索。

或許人總要在失去後才懂珍惜,在失利後才會學精。卡爾亦因輸到喊之後明白到投資其實並不簡單,曾經以為十分簡單的卡爾亦因此付出了沉重的化價;同時,投資並非只專注回報,同時亦要考慮風險的層面,嬴錢時當然卡爾亦沒有想過這點,到輸錢時才明白何謂風險兩個字;最重要的是,卡爾理解到世界沒有免費的午餐,與其相信財演那些不盡不實的投資建議,倒不如自己用心去分析一下,正所謂力不到不為財。
卡爾的投資歷程從來都不是一帆風順,不會是從來只嬴冇輸的財經達人,亦不會是能「預測」大市走勢的名人,當中的投資成長過程與很多人一樣都是有起有跌的,不過卡爾亦因此會在投資時分析更多及更全面,令到自己做到進可攻,退可守的狀況。
回想起來,其實投資與人生的成長過程亦有相似之處。剛踏入社會時總會高傲自滿,認為可輕鬆做出一番大事,但在經歷過不少事情及挫敗後,即使志氣未曾減亡,亦難免從中學會了更為全面的處事方式,而且亦會更加謹慎地行事。卡爾的投資與人生,正正就是如此的相似。

而你的投資歷程究竟又是怎樣的呢?

2017年9月6日 星期三

【直話直樹】銀行裡的體罰

一般人都以為做銀行福利好、放假多,朝九晚五、銀行關門就冇嘢做,計我話五點之後先係真正嘅地獄。

每個客戶經理手上面都有一對客戶的名單,有可能係平時自己照顧開嘅客人,亦有可能係由IT或者marketing部門經過所謂嚴格篩選嘅合適客戶。一般黎講打電話嘅目的只有兩種:第一係做生意、第二係約落嚟做生意。

老老實實啦,自己身為一個日理萬機嘅香港人,平日聽到電話推銷打黎係幾咁討厭架,客戶經理自己都明白,明明銀行關左門都要坐定定喺度打電話,就好似以前讀書俾人罰留堂咁,罰坐。

一般係五點直到收工(可能係八點或者九點),你老細就好似監考官咁行黎行去,驚死你唔做嘢咁。而客戶經理嘅種類一般黎講可以分為兩種人。

第一種係比較勤力同埋聽話嘅客戶經理,佢哋會認認真真咁樣打俾客戶,希望盡自己最後一分嘅努力去爭取到業績。

我自己本人覺得咁樣係冇問題嘅,直頭係好事添啦,問題係在於有一啲人走火入魔咁,用盡層出不窮嘅方法去約啲客落嚟,又或者係勤力勤到上晒腦,夜晚八點鐘仲打俾啲客,阻住人哋食飯休息。

第二種係享受喺捉迷藏遊戲嘅人,老細行去東面,佢就跑去係西面,咁行不幸地比老細撞到你手上面就扮住喺度講電話,成為最佳扮工員。

就咁睇佢係應該做嘢嘅時間唔做嘢,佢一個好懶嘅人。不過從另外一個角度去睇,佢好可能係明白到呢一種罰坐嘅模式係完全對佢嘅業績係唔會有幫助,好可能佢係日常工作時間已經做好佢應該要做嘅嘢,根本就唔需要俾人體罰。

經過左一輪罰坐時間之後,終於就要開會交代返自己約咗啲乜嘢客,同埋預計自己往後幾日嘅業績係如何,好明顯人類係唔會未卜先知,所以全部野都係老作啦。

直到打工仔最期待嘅Happy Friday,如果你業績做得唔好就會話你前幾日講大話,星期六罰你返工;如果你約客唔夠就會話你前幾日唔夠勤力,星期六罰你返工。呢一種明明放假都要返工係一件好冇生產力嘅事情,因為星期六晨早流流你都唔會想聽到電話啦,如果個客戶經理打嚟嘈醒你,你話你會唔會嬲啦。咁返工其實真係為罰而罰。


其實銀行嘅管理模式如果可以更加善用時間嘅話,整體客戶經理嘅質素同知識就唔會咁參差,但係啲時間偏偏就用咗嚟罰佢哋坐喺度打電話,所謂熟能生巧,佢哋最多咪練成左耳右耳一齊聽電話,晒氣啦。

2017年8月30日 星期三

【直話直樹】人工智能經理

「銀行客戶經理轉工就話難啫,如果我一心一意去前線發展嘅話,咁就冇問題啦!做sales係幫公司搵錢嘅職位,唔使學歷又搵到高人工,我對於呢份工作好滿意呀!」無錯,暫時來講都可能係嘅。

不過,大家試吓將目光放得長遠一啲,今年全個金融業都好Hit嘅一個話題就係:人工智能。

人工智能顧名思義,就係人類製造出來的腦袋,好多人都話佢可以代替人類做到嘅嘢,有好多嘅職位都有機會俾呢班人工智能去取代。你見宜家好多公司都係發展人工智能,例如某間著名嘅基金公司已經炒左一堆基金經理同分析員,用人工智能取代

如果呢一刻係客戶經理嘅你,有冇諗過如果人工智能普及化嘅時候,你又係唔係真係咁值錢呢?做前線唔需要任何market知識,淨係跟住銀行Investment direction比意見,每一日淨係打俾客戶去update review portfolio,你覺得人工智能識唔識咁樣去做?

咁係都係後勤嘅人俾人炒先啦,咁多日復一日同重複又重複嘅工序。啱嘅,不過我認為呢個只係「先」同「後」嘅分別,而家講緊嘅係人工智能取代人類,如果你身上面嘅技能係好容易被取代嘅話,其實都有危險性,不過我知道做得客戶經理嘅人唔多唔少都係十分自信嘅,冇咁容易嚇到你。你又試吓諗如果你係公司嘅管理層,有一個新科技可以幫你開源節流,你會比較想減少高薪嘅前線人員定係底薪嘅後勤呢?

你可能又會諗relationship呢一樣野係只有人類同人類之間先會做到嘅,你個客冇理由會鍾意同個機械人講心事架嘛,除非真係有多啦A夢出現,咁人同機器人先會有良好嘅感情。無錯呀,筆者亦都係咁樣認為, 不過你做緊間公又係唔係咁諗呢?試吓回想下你嘅日常生活入面,係唔係喺工作上多咗好多要問客戶資料嘅admin工作?例如:佢嘅健康情況、幾時想退休、有幾多個仔女、甚至佢有啲乜嘢人生目標添,全部都要入晒落電腦,佢地要數據真係幫到你sell野?心照啦。有啲銀行直情搞埋人工智能嘅投資顧問比賽,目的係啲乜?唔通真係鼓勵青少年創業咩,當然就係攞你idea啦!其實一切都係一個金融大騙局。


筆者最期望嘅事又會唔會發生呢?人工智能嘅人工唔需要去計佣金,咁銷售嘅時候咪會比較公平中肯囉。我哋再睇多次今日討論嘅話題:人工智能。佢係人類製造出來嘅嘢,銀行又點會真係為你着想呢?「少年,你太年輕了!」講到呢一度,無論身為客戶經理、金融從業員定後勤部門嘅各位,希望大家都盡快學一技之長去傍身,就算將來真係冇工做,起碼都唔使餓死。

2017年8月22日 星期二

【直話直樹】打風都要跑數?

「一定要8號、一定要8號、一定要8號…」相信呢個都係每個打工仔係準備打風嘅時候嘅心聲,突如其來嘅一日有薪假期,仲可以好好咁享受,但係作為銀行做客戶經理嘅你又係唔係真係咁諗呢?

放咗一日假就即係代表少咗一日跑數,target係唔會因為打風而少咗,反而唔知點解返番公司嘅時候好似爭人錢咁,俾人追債,更加大壓力。老細會想盡一切嘅藉口,話俾你聽你條數跑得唔夠好,你本來有權利享受嘅假期有機會要取消,原因呢?因為打颱風你已經放咗假。

第二日返到公司,即刻就起勢咁捽你,一開頭就問你琴日打風話嚟個客你約左幾時再嚟,你唔好諗住話你未約到,因為咁樣一定比老細話你:「你明知打風你都唔同個客再約個時間?」然後我心諗…

話晒都「今朝有酒今朝醉,明日愁來明日憂」,唔好理佢三七定廿一,放假休息左日先算,但係最慘嘅莫過於李氏力場突然間啟動,然後全世界一齊狗衝返公司,話就話交通延誤,可以俾你慢慢返公司,其實都係另一種虛偽。大家明啦!

明明唔夠12點鐘落波,返到公司1點鐘,然後唔知點解仲會無埋個lunch time,跟住嘅時間就係半日當一日咁去做,糧照出所以數照跑,銀行就多數都靜到隻蚊飛過都聽到,你就唯有打俾啲客去review一下啦,當然就係十問九唔應,好正常啫,俾你你都唔想應啦。

但係收工冇數又會比人問你原本今日約咗個客去咗邊呢?明明朝早先打完風,有經驗嘅大家都會知道係咁唔穩定嘅天氣下,個客放飛機嘅機會係十分之高嘅,然後俾人鬧嗰個又係你。

「點解個客會放飛機架?」「點解今日會冇數架?」「你明知今日天氣唔好,你啲客又放左飛機,你冇諗過用乜辦法去追番條數嫁咩?」_你老味,不如我放假都係屋企繼續call客丫笨,當然呢個只係我心裏面嘅諗法,從來都冇講過出口。打份工姐,你咪當佢耳邊風囉…

其實講咁多都係想鼓勵下大家,放鬆D啦客戶經理,唔好因為你老細嘅無理取鬧而覺得唔開心或者大壓力,更加唔好因為咁而做出啲呃客人嘅舉動,因為咁樣唔值得啊!如果你打風都好擔心你條數嘅話,一係你下次積極小小咁去諗,聽日一定會好天嘅,你個心會唔會快樂多少少?
大家好好休息,然後繼續俾人捽。